BAGUIO CITY – Ikonkonsidera ti lokal a konseho ti Baguio ti panakaideklara a Persona Non Grata ni PSSupt. Gregorio Lim, ti agdama a Deputy Regional Director on Administration ti Police Regional Office-Cordillera (PROCor).
Kasaruno daytoy ti kontroberyal a panakaiyakar sadiay Apayao ti maysa a kameng ti Traffic Enforcement Unit ti Baguio City Police Office kalapasan a sinitar ken pinalagipanna ti driver ti nasao nga opisial a naglabsing iti number coding system ti siudad.
Sigun kenni City Councilor Edgar Avila, saan nga inkamang ni SPO3 Alberto Tadeo kadakuada wenno asinuman nga opisial ti siudad ti nasao nga isyu.
Nupay kasta, iti agdama ket mangnamnama dagitoy a maala iti win-win solution ti nasao a parikot gaputa naituding nga agreport ni Tadeo iti PROCor.
Kinunana nga urayenda pay ti agbalin a resulta ti saritaan dagiti maseknan ken nu masolbar ti parikot ket saanen a kasapulan a matalantan iti konseho ti immunan a singasing ngem posible latta a maituloy daytoy kalpasan a nagaramid iti sabali a resolusyon ti Technical Traffic Management Committee kontra iti opisial.
Kagiddan iti daytoy, impettengna a saan a kasapulan ti pagillian dagiti abusado a nangangato nga opisial ti PNP a mangbul-bully kadagiti “beat policemen” wenno dagiti adda iti nababa a ranggo.
Iti kanito a maideklara a Persona Non Grata ti nasao nga opisyal ket saanen daytoy a mapalubosan nga agturong ditoy siudad ti Baguio.
Ibilbilang met ni Mayor Mauricio Domogan a Grave Abuse of Authority ken maysa a kita ti diktadorya ti inaramid ti PROCor a panangiyakarda kenni SPO3 Tadeo sadiay Apayao.
Gapu iti daytoy, kinuna ni Mayor Domogan a panggep ti Technical Traffic Management Commitee nga agipatulod iti surat kenni PSSupt. Lim ken kadagiti maseknan nga opisyal tapno malawlawagan ti nasao nga isyu.
Inlawlawagna a saan a rumbeng a maikkat ti maysa a traffic enforcer nga agar-aramid iti trabahona tapno maksayan ti nailet a taray ti trapiko kadagiti kalkalsada.
Kinunana a rumbeng nga agbalin pay kuma dagitoy nga ehemplo gaputa dagitoy ket opisyal a rumbeng a mangipatungpal iti linteg.
Kagiddan iti daytoy, kinunana a nakasarita na metten ni BCPO Acting City Director Ramil Saculles ken ni PSupt. Armando Gapuz, dadaulo ti Traffic Enforcement Unit ti BCPO para iti panangipatungpalda iti imbestigasyon.
Kinunana nga iti kanito nga awan ti aksyon dagitoy ket agaramidda iti surat tapno kiddawen ti maysa a dialogo seknan iti nasao nga isyu.
Pinadas met ti Bombo Radyo Baguio News Team nga alaen ti salaysay wenno komento ni SPO3 Tadeo ngem nagkedked daytoy nga agsao bayat nga ikagkagumaan ti News Team nga alaen ti dasig ti maseknan a driver a maysa met laeng a pulis, agramanen ni PSSupt. Lim.
