BAGUIO CITY -Manamnama a maideklara ti dakkel a paset ti ancestral domain ti Banao Tribe sadiay Balbalan, Kalinga kas maysa kadagiti protected landscape tourist destination iti pagilian.
Daytoy ti inwaragawag ni Department of Environment and Natural Resources-Cordillera Administrative Region (DENR-CAR) Director Ralph Pablo kabayatan ti 1st Quarterly Meeting ti Protected Area Management Board (PAMB-Banao) itay laeng nabiit.
Kinunana nga impalubosen ti DENR Central Office ti pundo a maaramat iti actual physical demarcation iti boundaries ti landscape a maipatungpal iti sumarsaruno a bulan.
Mangnamnama ni Pablo a ti panakaituloy ti sesyon iti kongreso inton Hunyo ti agdama a tawen ket maipasa kas linteg ti nasao a deklarasion.
Impettengna nga iti kanito nga agbalin a linteg daytoy ket maipabiang iti DENR-CAR ti panakaimaton ti nasao a lugar.
Inayonna nga addanto ti maibangon a field office ti ahensia iti Ducligan, Barangay Balbalasang.
Dinakamatna a manarimaan ti panakaaramid ti access road nga agturong iti nasao disso a pakaipatakderan ti nasao a pasdek.
Impanamnama ni Pablo a bigbigen ti Protected Area Management Board ti probision ti Indigenous People’s Rights Act iti panangbukelda ti management plan ti landscape.
Ti nasao a lugar ket sigud a naawagan ti “Balbalasang National Park”ngem maawagan daytoy ti “Banao Protected Landscape Area” no mapagbalin a linteg.
