BAGUIO CITY – Panggep ti City Veterinary Office a mangbukel iti maysa a programa para iti panakaikabil ti microchip kadagiti amin a taraken nga aso ditoy Baguio City.
Iti panakiyuman ti Bombo Radyo kenni City Veterinarian Dr. Brigit Piok, kinunana a panggepda a mangikabil ti microchip nga addaan ti reader iti uneg ti kudil dagiti aso.
Sigun kenkuana, mailanad iti microchip dagiti impormasyon ti maseknan nga aso kas iti nagan ken tawen ti aso, nagan ken address ti dog owner ken no nabakunaan daytoy.
Inlawlawagna a babaen iti daytoy ket nalaklaka a mabigbig no asino ti responsable nga indibidual iti kanito nga agbalin a walang dagiti aso ken no adda ti naperwisyo wenno nakagat dagitoy.
Innayon ni Dr. Piok nga adda ti mabayadan iti microchip a nasken a kabaelan nga ipaay dagiti dog owners.
Immunan a dinakamatna a panggepda metlaeng a rugian ditoy Baguio ti panakaiparehistro dagiti aso iti tunggal barangay.
Panggep pay ti City Veterinary Office a kiddawen ti tulong iti lokal a gobyerno para iti panakapondo ti nasao a programa tapno maiyemplementar inton sumaruno a tawen.
Kidkiddawen met ni Dr. Piok kadagiti dog owners ti panag-avail dagitoy iti microchipping kadagiti accredited a veterinary clinic kadagiti barangayda kabayatan ng awan paylaeng ti suplay ti City Veterinary Office.
