BAGUIO CITY – Kukuwestionaran dagiti miembro ti Water Refilling Stations iti lokalidad ti mandato ti Department of Health Cordillera nga ikalikagumda ti operational permit tapnu agala manen iti business permit dagitoy.
Sigun kenni Atty. Nellie Macadadang Olairez, Founding President iti Baguio Association of Purified and Mineral Water Refillers, Inc., ita laeng nga maimanmandato kadakuada ti panagalada iti operational permit iti baet a manuna tawen ti operasyon dagitoy iti lokalidad.
Mamati dagitoy a maysa daytoy a kita ti korapsion ti nasao nga ahensya gaputa awan ti nakalanad iti Water Sanitation Code of the Philippines a nasken a mangalada iti sanitation permit ken maiyaplikar laeng daytoy a polisiya kadagiti water supply system saan ket a kadagiti water refilling stations.
Kinunana pay nga awan ti pakibiangan ti nasao nga ahensya iti nasao a banag gaputta saanda a miembro iti Local Drinking Quality Monitoring Council ti siiudad ken awan iti visitorial Power dagitoy tapnu mangisayangkat iti nasao nga polisiya.
Impettengnaa nadagsen daytoy a banag para kadagiti dadduma nga miembroda gaputta nasken nga agbayada iti P10,000 agingga P15,000 para iti sanitary engineer iti kanito nga mangalada iti sanitation Permit.
Impetteng pay ti kompanya a nakasaganada nga umapela iti korte iti kanito a saan a sungbatan ti DOH-Cordillera ti pakaseknanda.
Impanamnamada met nga iti kanito a mailawlawag kadakuada ket saanda nga agkedked nga agtungpal nangruna no pagsayaatan met daytoy dagiti kliyente wenno umili nga supsupplyanda iti lokalidad.
Iti agdama ket dumanon iti 274 ti membro ti nasao nga assosasyon ditoy lokalidad.
KABAYATANA,
Impetteng ti Department of Health (DOH-Cordillera) nga adda ti basaranda iti pammilin nga naipaulog seknan iti panagala ken panagrenew dagiti water refilling stations iti operational permit dagitoy.
Immunan nga impeksa dagiti asosasyon ti water refilling station ti pakaseknanda iti pakdaar ti DOH ti panagalada ti operation permit ken ti panagalada ti Environmental Sanitation Clearance tapno maipanamnama ti kinadalos dagiti danum nga ilako dagitoy.
Sigun kenni DOH-Cordillera Assistant Regional Director Dr. Amelita Pangilinan, naduktalan nga awanan dagitoy iti operational permit.
Inlawlawagna a nasken nga addaan ti tunggal water refilling station iti operational permit tapno masukimat ti pagtaudan ti danum ken maipanamnama a nadalos dagiti mainom a danum.
Kinunana nga idi nakaawat dagitoy ti reklamo seknan iti nasao nga banag ket dagusda nga inyuman iti central office ti environment and sanitation bureau nu sadinno kinunada nga umno laeng ti pammilin nga inruwar dagitoy.
Inayonna a nangipatuloddan ti surat iti nasao nga asosasyon para iti mapadaanan a panag-dayalogo dagitoy.
Dinakamatna pay a kanayun met nga nakalukat ti opisina dagitoy ken nagbalinda met nga transparent kadagiti nasao nga isyu.
