BAGUIO CITY – Ad-adalen ita ti maseknan a komite iti Sangguniang Panlungsod ti Baguio ti singasing nga ordinansa a mangisaksakad iti panakailaylayon ti oras a panagbiahe dagiti pasapasahero a jeep iti siudad iti agingga alas dies ti rabii manipud iti alas nuebe ti rabii.
Immuna iti daytoy, inaprobaran ti konseho iti umuna a panagbasa ti singasing nga ordinansa a mang-aymendar iti Ordinance No. 66, series of 1995 a mangikalkalikagum iti panagbiahe dagiti amin a jeepney operators ken drivers associations iti Baguio iti agingga alas nuebe ti rabii.
Nailanad iti singasing nga amin nga asosasyon dagiti pasapasahero a jeep iti siudad nga addaan 15-25 nga units ket nasken a mangdutok iti saan a bumaba iti pito nga unit nga agbiahe iti alas sais agingga alas dies ti rabii iti innaldaw.
Nailanad met a dagiti asosasyon nga addaan ti 26-35 nga units ket mangdutok ti saan a bumaba iti 10 nga units bayat a dagiti asosasyon nga addaan ti 36 nga agpangato nga units ket mangdutok iti saan a bumaba iti 12 nga units.
Naputar ti singasing nga ordinansa kas sungbat iti adu ken nagduduma a reklamo dagiti pasahero, nangruna dagiti marabrabian unay gapu iti kinakurang dagiti agbibiahe a jeep iti lugar dagitoy.
