BAGUIO CITY – Iyap-apela dagiti residente iti masakupan ti Mulberry Alley sadiay Asin Road, ditoy siudad ti Baguio ti dagus a panangileppas ti kontraktor iti patrabaho sadiay, partikular ti kabite a dumanon iti 360 metro.
Iti panakaiyuman ti Bombo Radyo kenni Jonard Cachio, residente iti nasao a lugar, parikutda ti manarimaan a konstruksion sadiay gaputa bimmayag unay ken adun dagiti apektado nga umili.
Kinunana nga agamakda iti posibilidad a margaay ti kabite sadiay nangruna iti batog dagiti babbalay ita a panagtutudo.
Sigun kenkuana, mabalin a matrabaho ti kabite sadiay tapnu saan nga agpeggad dagiti babbalay iti ngato ngem irasrason dagiti trabahador sadiay nga awan ti pagalaanda iti bato.
Gapu iti daytoy, iyap-apelada ti panangipangruna ti kontraktor iti kabite ti nasao a proyekto.
Naamuan a nangrugi ti patrabaho idi Pebrero ken nakompleton kuma idi Marso ngem agingga ita ket saan paylaeng a nalpas.
Innayonna pay a gapu iti innaldaw a panagtudona ket adu a residente ti apektado ken mapitpitak ti sapatos dagitoy iti maiyar-aramid a kalsada.
