Inaprubaran ni Department of Budget and Management (DBM) Amenah “Mina” F. Pangandaman ti panakailukat ti 4,265 a posisyon para kadagiti nagduduma nga Field Offices ti Department of Social Welfare and Development (DSWD).
Daytoy ket tapno masuportaran ti implementasyon ti Pantawid Pamilyang Pilipino Program (4Ps), nga agpangpanggep a mangalay-ay iti kinakurapay ditoy pagilian.
Inlawlawag ni Pangandaman a napateg a masuportaran ti programa ti gobyerno para kadagiti 4Ps tapno magun-odan ti pudpudno nga inklusibo a panagdur-as para iti amin, tapno makalung-aw iti biag dagiti nakukurapay.
Impaganetget ni Pangandaman a babaen iti panakabukel ti kanayunan a trabaho, sumayaat met ti cash-flow ken mangipaay daytoy iti positibo nga epekto iti pakabuklan nga ekonomiya ti pagilian.
Sigun kenni Pangandaman, nabukel dagiti contractual Project Development Officer II (PDO II) positions tapno manayunan ti agdama a bilang dagiti staff ti DSWD ken maipanamnama a maipatungpal a nasayaat dagiti annongen dagitoy ken magun-odan ti caseload a maysa a manager iti tunggal 300 a pagtaengan.
innayon pay ni Pangandaman, a sigun gamin iti kaudian a datus ket dumanon iti 3.9 million a household ti sakupen dagiti benepisyaryo iti pagilian.
Sigun kenni Pangandaman, ti kasapulan a pondo para iti panakailukat ti nasurok uppat a ribu a trabaho ket agtaud iti nabatbati a pondo ti DSWD iti agdama a tawen, ken no agkurang daytoy ket agalada iti pondo manipud iti naaprobaran a Fiscal Year 2024 General Appropriations Act.
