BAGUIO CITY – Sakbay a narugian ti patrabaho ti DPWH ken City Engineering Office a panakatarimaan ti biking area sadiay Burnham Park ket napalagipanen ti kontraktor a mangimuntar ti pakdaar ken barikada.
Daytoy ti nagbalin a palawag ni City Administrator Bonifacio Dela Peña kasaruno ti panakatnag ti maysa nga ubbing nga agbisbisekleta iti nasao a pasdek idi kanikadua.
Inlawlawagna nga adda dagiti gundaway a temporaryo a maikkat dagiti barikada no maisayangkat ti panagkali dagiti truck a nairana met a nagbisikleta ti ubbing rason a naaksidente daytoy.
Impasiguradona met a kanayonda a palagipan dagiti kontraktor, personnel ti DPHW ken CEO seknan iti panangimuntarda kadagiti safety measures.
Inaklonna a nakapungtot ni Mayor Benjamin Magalong iti napasamak nga insidente gaputa uray proyekto daytoy ti DPWH ket isupsupervise latta ti siudad.
Nagkiddaw metten ni Dela Peña ti dispendar iti maseknan nga indibidual ken inkarina a papartakan ti CEO ken DPWH ti panakaileppar ti proyekto dagitoy tapno saanen a maulit ti nasao nga insidente.
