BAGUIO CITY – Inaprobaranen ti National Wages and Productivity Commission ti panakaipangato ti minimun wage iti sumagmamano a paset ti rehion Cordillera.
Iti panakipatang ti Bombo Radyo kenni Augusto Aquillo, board secretary ti Regional Tripartite Wages and Productivity Board – Cordillera, kinunana a naawaten ti opisinada ti kumpirmasyon para iti nasao a banag.
Kinunana nga inton Lunes ket maipablaaken iti pagiwarnak ti baro a wage order para iti panakaipangato ti minimum wage ditoy rehion.
Linawlawaganna nga iti siudad ti Baguio ken munisipyo ti La Trinidad, Benguet ket manayonan iti P15 ti innaldaw a minimum wage isut gapuna nga agbalin a P300 ti minimum wage per day kadagiti nasao a lugar.
Innayonna a kadagiti met dadduma a probinsia nga addaan iti innaldaw a minimum wage a nababbaba no iti P285 ket manayonan iti P25.
Naituding met a mangisayangkat iti press conference ti Department of Labor and Employment inton May 24 tapnu ilawlawagda no apay a saan nga agpapada ti panakaipangato ti sweldo iti rehion.
Manamnama nga inton June 5 ket epektibon ti nasao a wage order kalpasan ti panakaipablaakna iti 15 nga aldaw.
Immunan a nag-epektibo ti panakaipangato ti minimum wage dagiti kasambahay iti rehion idi napalabas a May 8.
