BAGUIO CITY – Narigat latta ti pannakaipaay ti relief goods kadagiti dadduma nga overseas Filipino workers (OFWs) sadiay Vietnam.
Sigun ken ni Bombo International Correspondent Dahlia Nacor, tubo ti Baguio City ken English Teacher sadiay Vietnam, adda dagiti organisasion dagiti Pilipino sadiay a tumultulong kadagiti padada a Pinoy.
Nupay kasta, kinunana a parikot ti pannakaiwaras ti tulong kadagiti OFWs kadagiti adayo a lugar sadiay Vietnam.
Dinakamatna a narigat a maibiahe dagiti relief goods gapu iti kinaadyo ti dadduma a lugar sadiay.
Mainaig iti daytoy ket kinuna ni Nacor a maipaspasidong iti repatriation dagiti Pinoy workers sadiay Vietnam a tarigagaydan ti agawid.
Kinunana a normal pay met ti suplay kadagiti kangrunaan a gagatangen sadiay ngem naibusen ti suplay iti face mask.
Maibasar iti kaudian a report, dumanonen iti nasurok 260 ti bilang dagiti positibo a kaso ti COVID 19 sadiay Vietnam.
