BAGUIO CITY – Isaksakad ti Baguio City Police Office (BCPO) ti panakapaingato ti multa dagiti matiliwan nga iligal a nakaparada kadagiti kalkalsada iti siudad ti Baguio.
Sigun kenni Acting City Director, Police Colonel Allen Rae Co, babaen iti daytoy ket agnakem dagiti motorista nga agparparada iti saan nga umno a lugar no maipangato ti multa ti illegal parking.
Kinunana a natured dagiti motorista nga agparada iti saan nga umno a lugar gapota P150 laeng ti multa ti maikkatan ti plaka ken nalaklaka pay daytoy no idilig iti bayad kadagiti mabaybayadan a paradaan.
Mamati met ti BCPO a babaen daytoy ket maksayan ti parikut iti nailet a trapiko ditoy siudad.
Kabayatanna, umap-apela ni Police Major Oliver Panabang, dadaulo ti Traffic Management Unit ti BCPO kadagiti agtugaw a konsehal iti siudad para iti panangilepasda iti ordinansa a mangipangato iti multa ti illegal parking.
Iti panakiyuman ti Bombo Radyo, kinunana a saan a naikamakan dagiti outgoing city officials ti panakailepas ti nasao nga ordinansa.
Kiniddawna met kadagiti agtugaw a konsehal a suportaranda dagiti amin a rekomendasyon ti pulisya seknan iti parikut ti trapiko iti siudad. (-Bombo Maureen Bassit / Bombo Brigitte Marcasi/ Bombo Charles Nikko Limon)
