BAGUIO CITY – Agtultuloy ti panagpalagip ti Baguio City Police Office maipapan iti pannakaiparit ti panagsugal iti siyudad.
Kasaruno daytoy ti naduktalan a kaso ti panaglabsing iti Presidential Decree 1602 wenno ti Philippine Illegal Gambling law bayat ti Anti-illegal gambling operation idiay Purok 14, Lower Cypress, Irisan, Baguio city.
Iti nasao nga operasyon, nakemmeg ti 65-anyos a babai, awanan trabaho; 51-anyos a lalaki, taxi driver; ken 63-anyos a lalaki, awanan trabaho, dagitoy ket bin-ig a residente iti nasao a lugar.
Nakumpiskar manipud kadakuada ti 52 a pidaso ti playing cards, maysa a plastic table, uppat a monoblock chair, ken cash money nga aggatad ti P1,452.
Naiturong dagiti indibidual ken dagiti nakumpiskar nga ebidensiya iti kustodiya ti pulisya para iti umno a disposisyon.//Bombo Jez Lapizar
