BAGUIO CITY – Agtultuloy ti panagbakuna kadagiti narisgo nga indibidual, panakaipaay ti maikadua a dose ti bakuna kontra iti COVID-19, ti panakaituloy ti mobile vaccination kadagiti babbarangay iti Baguio City ken panakabigbig ti kanayonan a vaccination sites.
Iti interview ti Bombo Radyo Baguio, kinuna ni Assistant City Health Officer ken mobile vaccination team leader Dr. Celia Flor Brillantes a paset daytoy ti kampanya ti Baguio tapnu maipangato ti immunity wenno proteksion dagiti umili ti siudad kontra iti COVID-19.
Kinunana nga ad-adun a bakuna ti maiwarwaras iti siudad agingga iti weekend ken idi Lunes, August 9 ket 50.29% kadagiti eligible population ti Baguio ti nabakunaanen kontra iti COVID-19.
Pinagyamananna met ti Department of Health iti panakaipangruna ti Baguio iti vaccination rollout ti gobyerno gaputa dakkel daytoy a banag iti panakasalwad dagiti umili kontra iti nakaro a kaso ti COVID-19.
Innayonna a nasken a maguyugoy dagiti umili ti siudad nga agpabakuna kontra iti COVID-19 nangruna ta iti datus ket 70-80 percent kadagiti nakaptan ti coronavirus iti siudad ket dagiti saan a nabakunaan.
Naamuan nga 68 manipud iti 128 a barangay ti Baguio ti nagsumitiren iti listaan dagiti saan pay a nabakunaan a senior citizens ken persons with comorbidities iti masakupan dagitoy.
Kabayatanna, impasigurado ni Dr. Brillantes ti panakatungpal ti maminpito a panagbakuna iti makalawas babaen kadagiti dadakkel a vaccination sites pakairamanan dagiti district vaccinations ken satellite vaccination sites.
