[photo credit to owner]
BAGUIO CITY – Kidkiddawen ti Baguio City Market Authority (BCMA) ti dagus a panakaipatungpal ti ‘zoning’ iti merkado publiko iti siudad ti Baguio.
Sigun kenni BCMA supervisor Fernando Ragma, kasapulan ti zoning ordinance ken Comprehensive Development Plan iti merkado publiko tapnu ad-adda pay a pumintas ti operasyon sadiay.
Kinunana a babaen iti daytoy ket nalaka met laeng a masukimat no adda umno a business permit dagiti vendors ken tapnu maisimpa dagiti tagilako iti nagduduma a section iti merkado publiko.
Innayonna nga iti agdama ket aglalaok dagiti tagilako dagiti vendors ken stall owners iti Baguio City Public Market.
Kidkiddawenna met ti panakitinnulong dagiti maseknan a vendors ken stall owners sadiay para iti panakapapintas pay ti serbisyo nga ipapaayda kadagiti kustomer ken iti kinadalos ti aglawlaw ti entero a merkado.