BAGUIO CITY – Naaprobaranen iti lokal a konseho ti Baguio iti umuna a panakaibasana ti singasing nga ordinansa a mangipawil to iti panagngalngal ti momma kadagiti parapubliko a lugar ditoy siudad.
Sigun kenni Vice Mayor Edison Bilog, panggep ti singasing nga ordinansa nga ital-o ken isuro ti panangtariparo iti salun-at ken iti aglawlaw.
Kinunana nga iti kanito a maaprobaran ti singasing ket mapatawan iti pannusa dagiti aglabsing iti daytoy.
Nailanad iti singasing a maipawil ti panagngalngal ti momma kadagiti natatao a luglugar iti merkado publiko ken kadagiti parke nangruna ta narugit a kitkitaen dagiti tupra manipud kadagiti momma.
Dinakamat pay ti bise mayor ti saan a panangkanunong dagiti sumagmamano a health experts iti panagngalngal ti momma gapu iti saan a nasayaat nga epekto daytoy iti salun-at.
