BAGUIO CITY – Kidkiddawen ti environmental group nga EcoWaste Coalition ti panangipasardeng ti lokal a gobyerno ti siudad ti Baguio iti panakailako dagiti napeggad a cosmetics a naduktalanda nga addaan ti nangato a mercury content.
Sigun kenni Thony Dizon, chemical safety campaigner ti koalisyon, nangisayangkatda ti test buy ditoy Baguio idi July 6 ken rimwar iti panagsukimat nga addaan ti nangato a mercury content ti sumagmamano kadagiti ginatangda a cosmetic products.
Kinunana a manipud iti 15 nga skin whitening creams ket 14 kadagitoy ti naglaon ti mercury a dimmanon ti 700 parts per million nga adayo a nangatngato no iti 1 part per million a mercury limit nga itudtuding ti ASEAN Cosmetic Directive.
Ginatang ti grupo dagiti nasao a cosmetics manipud kadagiti beauty ken health product stores iti Baguio Center Mall ken Maharlika Livelihood Complex.
Dinakamatna a nakaalada ti resibo dagiti nasao a produkto a bin-ig nga imported, saan a rehistrado ken awanan ti market authorization manipud iti Food and Drug Administration.
Sinuratan metten ti EcoWaste Coalition ni Baguio Mayor Benjamin Magalong para iti panangipatungpalna iti ordinansa a mangipawil iti panagaramid, panag-angkat, panakaiwaras ken panakailako dagiti mercury-containing skin whitening cosmetics iti siudad.
Naamuan a nangisayangkat ti koalisyon iti kapada a panagsukimat idi napalabas a tawen ken naduktalan ti panakailako dagiti toxic cosmetics iti sumagmamano a pagtagilakuan ditoy Baguio.
Maibasar iti panagadal ti World Health Organization, napeggad iti salun-at, partikular iti kidney dagiti mercury-containing skin lightening products malaksid pay iti adu a saan a nasayaat nga epekto ti mercury iti kudil.
