BAGUIO CITY – Mabigbigbig iti social media ti grupo dagiti agtutubo sadiay Tabuk City, Kalinga kalpasan ti panakaiyuswatda iti maysa a proyekto a panaka-resiklo dagiti tarpaulins a naaramat iti eleksion.
Inyuswat ti nasao nga grupo ti ‘Project Tarps’, tapnu maliklikan nga maiwara ken agpullat kadagiti canals dagiti campaign materials a naaraamat iti kaleppas nga eleksion.
Sigun kenni Marion Tombaga, Presidente ti nasao nga proyekto panggepda a suportaran ti implementasyon ti maysa nga ordinansa sadiay Tabuk City.
Mandato ti Ordinance No. 003 Series of 2021, ti regulasyon ti panagaramat ti cellophane, sando bags ken styrofoams.
Kinuna pay ni Tombaga nga imbes a maibelleng dagiti campaign materials a naaramaten iti eleksion pagbalinenda laengen dagitoy nga ecobags a mabalin pay nga aramaten ti publiko.
Inyunay-unayna manen ti panggep ti proyekto a salwadan ti aglawlaw ken ipagannetget ti panakaipawil ti single-use plastic iti merkado sadiay Tabuk City.
