BAGUIO CITY – Naibilin iti panakaiparikep ti maysa nga iligal a pagtagilakuan ti chicken dung sadiay Shilan, La Trinidad, Benguet.
Sigun kenni La Trinidad Mayor Romeo Salda, gapu paylang daytoy iti kaawan ti permit ti nasao a chicken dung dealer.
Kinunana a namin adu a daras a nangipatulodda iti pakdaar ken closure order gapu iti iligal nga operasyon ti nasao a pagtagilakuan ngem saan daytoy a nagtungpal a mangiproseso iti permit.
Dinakamatna a maysa pay a rason iti panakaiparikep ti establishimento ti reklamo dagiti residente sadiay gapu iti kinaangot dagiti rugit ti manok.
Innayon ni Mayor Salda a saanda a sardengan ti nasao a dealer agingga a saan daytoy a pumanaw sadiay.
Maipalagip a naiserbian iti closure order dagiti sumagmamano a chicken dung operators sadiay Shilan idi pay napalabas a bulan ken naipaayan dagitoy iti pawayway tapno ipaibus ti lakoda nga abono ngem saanda latta a nagtungpal.
