Manamnama a makissayan ti bilang dagiti Pilipino nga agtuturong iti ballasiw-taaw wenno kadagiti siudad kalpasan nga inaprobaran ti House Committee on Labor and employment ti P200 across-the-board daily wage increase.
Daytoy ket kasaruno ti kaudian a katulagan dagiti kongresista ken worker organizations seknan iti nasao a rate.
Iti panakiuman ti Bombo Radyo kenni Mike Cabangon, dadaulo ti Kilusang Mayo Uno, kinunana a dakkel a tulong ti P200 kadagiti mangmangged gapu ta saan a mailibak a ngumatngato ti presyo dagiti gagatangen.
Manamnama met a dumalan daytoy iti senado sakbay a maiturong kenni President Ferdinand Marcos Jr.
Ngem, impetteng ni Cabangon a saan ladta nga umdas ti P200 a naaprobaran iti house committee rason nga isakad-da ladta ti P1,200 a family living wage gapu ta daytoy ti sweldo a makabiag nangruna kadagiti pamilya a buklen iti lima a tao wenno nasursurok pay.
Kinuna pay ni Cabangon a nasayaat ti naipatungpal nga across-the-board daily wage increase gapu ta agpada met ti magasgastos kadagiti nagduduma a paset ti pagilian, iti rehiyon man ti Cordillera wenno sadiay Metro Manila.
Gapu iti dayta, kinuna ni Cabangon a nasaysayaat a maikkat ti Regional Tripartite Wages and Productivity Board (RTWPB).
Malakid iti dayta, nasaysayaat no ti mapatibker ket ti sweldo dagiti mangmangged ken saan a dagiti maipapan iti ayuda a kas iti Ayuda sa Kapos ang Kita Program (AKAP) a mamingsan laeng a maipaay ken mabalin pay nga ibulsa dagiti politiko.
