BAGUIO CITY – Agtalek latta ti Cordillera Regional Development Council ken ti National Economic and Development Authority (NEDA) – Cordillera nga ideklara ni Presidente Rodrigo Duterte nga urgent bills dagiti maisaksakad ita a gakat para iti panagbalin nga autonomous region ti Cordillera.
Iti interview ti Bombo Radyo Baguio, kinuna ni NEDA-Cordillera Assistant Regional Director Stephanie Christiansen nga ar-aramidenda ti amin tapnu makadanon iti presidente ti nasao a pakaseknan nangrunata umadanin ti maudi nga State of the Nation Address daytoy.
Dinakamatna nga agtultuloy a mataltalantan sadiay Kamara ti dua a gakat para iti panakabuangay ti Autonomous Region of the Cordillera bayat a saanda a sumarsardeng a mangisaysayangkat iti panangiwaras ti impormasyon seknan iti daytoy.
Innayonna nga agtultuloy a makaaw-awatda iti written statements of support manipud kadagiti lebel ti munisipyo agingga kadagiti nagduduma nga ahensia ti gobyerno ken kasapulan dagiti nasao a manifest of support tapnu maikalintegan ti panakaisakad ti otonomiya.
Sigun pay kenni Christiansen, malaksid kadagiti panagturong dagiti regional speakers kadagiti nasusulinek a lugar iti rehion tapnu iyam-ammo ti maisaksakad nga otonomiya ket aktibo ita ti kampanyada babaen iti social media platform.
Kinunana a ditoy nga agipabpablaakda kadagiti impormasyon ken question and answer para kadagiti umili tapnu ad-adda a maawatanda ti regional autonomy.
