BAGUIO CITY – Naibilin ti panakaisardeng ti excavation activity wenno panagkali iti paset ti maysa a pribado a lote sadiay Balucas, Shilan, La Trinidad, Benguet.
Daytoy ket kalpasan ti naisayangkat a joint-inspection iti disso ken sadiay a naduktalan nga iligal ti aktibidad gaputa awanan daytoy ti kaskenan a permit kas iti Environmental Compliance Certificate.
Imbalakas ti inspection team ti panangisardeng ti lot owner ken ti land developer iti aktibidad sadiay.
Iti met panakiuman ti Bombo Radyo Baguio kenni Shilan Punong Barangay Jeffrey Maslag, dinakamatna a panggep ti lot owner a mapagbalin a tourism site ti disso a nakaisayangkatan ti panagkali.
Inyunay-unayna met a ti naipakada iti opisinada ket panakailukat laeng ti kalsada isut gapuna a saanda a ninamnama ti naisayangkat a panagkali tapnu mapagbalin a tourism site ti nasao a disso.
Dinakamatna a sakbay pay ti bagyo a Maring ket limed a rinugian ti land developer ti aktibidad sadiay a rason no apay a saanda a dagus a nasitar daytoy.
Kinunana nga asideg iti barangay road ti pribado a lote ngem adda ti pasang-at a paset ti bantay a nakaisayangkatan ti excavation activity.
Innayon ti kapitan a karaman nga im-imbestigaranda ti kinasiasino ti agtagikua iti naaramat a backhoe, ti pakabigbigan ti lot owner ken ti land developer.
Immuna iti daytoy, nakaawat iti atension ti nasao a pakaseknan kalpasan nga impablaak ti maysa a maseknan nga umili ti iligal nga aktibidad a rason iti panagaksion ti lokal a gobyerno ti La Trinidad.
Inreklamo ti nasao nga umili ti panakaidalan ti backhoe sadiay Caban, Beckel a mangdadael iti kalsada ken ti kaawan ti naiyaplag a goma a pagnaan ti kagawaan tapnu saan a madadael ti kalsada.
