BAGUIO CITY – Pagsagsaganaan ita ti Baguio Tourism Office ken Baguio Creative Council ti panakaisayangkat ti Ibagiw Festival 2021 ditoy siudad ti Baguio inton sumaruno a bulan ti Nobyembre.
Sigun kenni City Tourism Officer Engr. Alec Mapalo, babaen iti daytoy ket maital-o dagiti nagduduma nga arts ken crafts ditoy rehiyon Cordillera, pakairamanan dagiti cultural heritages.
Dinakamatna a gapu iti agdama a pandemya maisayangkat iti online dagiti nagduduma nga aktibidad kas iti webinars, online e-commerce kadagiti produkto ti rehiyon ken kompetisyon iti panag-abel, panakaiparang dagiti arts, cultural shows ken dadduma pay.
Kinunana a kangrunaan a puntiryada ita a tawen ket ti panakabukel ti online platform a pakailakuan dagiti nagduduma a produkto ditoy rehiyon.
Mangnamnama dagitoy a balligi a maipatungpal dagiti nasao nga aktibidad iti baet ti pandemya nangruna ta nagbalin a naballigi ti panakaipatungpal ti festibidad idi napalabas a tawen uray limitado laeng ti bilang dagiti napalubusan a nakastrek ditoy siudad.
Innayonna pay a nailukat metten ti Baguio kadagiti full vaccinated a turista isut gapu a mangnamnamada nga ad-adu pay a turista ti sumangbay ditoy siudad kagiddan ti panakarambak ti Ibagiw Festival. (report ni Bombo Brigitte Marcasi)
