BAGUIO CITY – Kidkidawen ni Baguio City Mayor Mauricio Domogan iti dadaulo ti Police Regional Office- Cordillera ti panakaitantan ti panakaiyakar ni SPO3 Alberto Tadeo sadiay Apayao agingga a marisot ti sangsangwenna nga isyu. Mainaig iti daytoy, panggepna a makitaripnong kadagiti dadaulo ti ProCor nangruna kenni Regional Director PCSupt. Elmo Francis Sarona ken iti Assistant Regional Director para iti manamnama a panakasolbar ti isyu.
Impettengna a saanna a kayat a dumakkel pay ti isyu gaputa agpapada laeng dagitoy nga agserserbi iti gobierno. Malaksid iti dayta, kinniddawna pay iti lokal a konseho ti Baguio ti panangitantan dagitoy iti panakaipasa ti resolusyon a mangideklara kenni PSSupt. Gregorio Lim a Persona Non Grata iti siudad.
Agingga ita ket nangkedked pay laeng a mangipay iti komento ti maseknan a ni Tadeo ken ni Baguio City Police Office Acting City Director PSSupt. Ramil Saculles mainaig iti nasao a kontrobersya.
Maipalagip a sinitar ni Tadeo ti pulis a driver ni Lim a naglabsing iti number coding scheme ti siudad. Naamuan nga imbaga ti driver a lugan ni Lim ti imanmanehona ken pulis met laeng dagitoy isut gapuna a binagbagaanna dagitoy ni Tadeo nga agserbi nga ehemplo, ken saannan nga impaayan daytoy iti citation ticket.
Nupay kasta, naklaat ti kaaduan gaputa killaat a naipaulog ti pammilin para iti panakaiyakar ni Tadeo sadiay Apayao. Immunan met nga inlawlawag ni PSSupt. Angelito Casimiro, deputy regional director on operations ti PROCor, a naiyakar ti nasao a traffic enforcer gapu iti “side comments” daytoy. Dinakamat pay ti opisial a malaksid iti nasao a kaso ket adda met laeng ti pending case ni Tadeo a misconduct ken nonfeasance.
