BAGUIO CITY – Ad-adalen ita ti lokal a gobyerno ti Baguio ti panakaituding ti window scheme dagiti parapasahero a jeep tapnu maksayan ti nailet a gunay ti trapiko.
Sigun kenni Mayor Mauricio Domogan, ad-adalenda ti scheme para iti panakasuspindir ti number coding scheme kadagiti partikular a panawen ken ti makabulan a panakaimplementar ti nasao a plano tapnu maadal no epektibo wenno saan.
Dinakamatna a kitaen ti Baguio City Police Office (BCPO) ti posibilidad iti panakailaksid ti sumagmamano a parapasahero a jeep manipud iti Number Coding Scheme tapnu maipalubos ti panagbiahe dagitoy manipud iti alas sais agingga alas nuebe ti agsapa.
Kinunana a babaen iti daytoy ket maipasigurado a matungpal ti scheme ti panggep daytoy a panakanayon dagiti mabalin a pagluganan dagiti pasahero.
Immuna iti daytoy, naawat ti Transportation and Traffic Management Committee dagiti petisyon manipud kadagiti residente ti Sto. Tomas Proper ken Irisan a mangirekreklamo iti kinakurang dagiti pasapasahero a jeep a paglugluganan dagitoy kabayatan ti rush hours.
Isingsingasing met ti Federation of Jeepney Operators and Drivers Association – Baguio-Benguet chapter ti panakaipalubos ti panagbiahe dagiti pasapasahero a jeep iti agingga alas nuebe iti rabii kas maitunos iti ordinansa ti Baguio.