BAGUIO CITY – Impalubos ti Department of Environment and Natural Resources (DENR) – Cordillera ti panakaituloy ti operasyon ti Irisan Dumpsite ditoy siudad ti Baguio.
Iti panakiyuman ti Bombo Radyo, kinuna DENR-Cordillera regional director Ralph Pablo a daytoy ket kalpasan nga inpanamnama ti lokal a gobyerno ti siudad ti panagtulnogna kadagiti pagalagadan iti panakaaramat ti dumpsite.
Inlawlawagna a kalpasan ti 24 nga oras manipud naipaulog ti closure order ti Irisan Dumpsite idi napalabas a lawas ket nakaipaay iti sungbat ti lokal a gobierno ti Baguio.
Gapu iti daytoy, napatgan ti apela a panakaituloy latta ti operasion ti Irisan Dumpsite ngem adda dagiti kondision para iti daytoy.
Dinakamat ni Pablo a nasken nga amin a naurnong wenno nakapempen a mixed waste materials wenno raw compost a nalaokan kadagiti plastik ket maikkat iti nasao a disso ken amin nga equipment wenno makina a maaramat iti panakaiproseso dagiti raw compost tapnu agbalin nga organic fertilizers ket maimuntar ken agkurri.
Innayonna a nasken pay a dagiti laeng marunrunot a basura ti maibelleng sadiay ken awan ti residual waste a maipempen sadiay.
Intudingda met nga amin dagiti kondisyon ket nasken a matungpal sakbay wenno inton tapos, July 31.
Sigun kenkuana, ti panagbalin ti Irisan Dumpsite kas environmentally-friendly eco-park ket nasken a malpas iti panagngudo ti agdama a tawen wenno inton December 31.
Impetteng ni Pablo nga apaman a saan a masurot dagiti kondision ket maiparikep manen ti Irisan Dumpsite.
Inkari ti DENR-Cordillera, babaen iti Legal Division daytoy ken ti Environmental Management Bureau ti nainget a panangwanawanda iti panagtungpal ti Baguio LGU kadagiti kondisyon nga intuding daytoy.
