BAGUIO CITY – Kidkidawen ti kabarbaro a hepe ti Tuba Municipal Police Station (MPS) iti panakaiyakar dagiti road signs iti masakupan ti Marcos Highway, Tuba, Benguet.
Sigun kenni PMaj. Dominador De Guzman Jr., OIC ti Tuba MPS, naobserbarna nga awan ti umno a lugar a pakaisayangkatan ti inspeksion sadiay Marcos Highway.
Gapu iti daytoy, insingasingna ti panakaiyakar dagiti road signs kadagiti visible areas wenno kadagiti disso a nalaka dagitoy a makita dagiti motorista nangruna dagiti first timers a sumang-at iti Baguio City.
Innayonna nga adu dagiti road signages iti nasao a kalsada isut gapuna a nasken a madalusan dagitoy tapnu maliklikan ti panakatikaw dagiti motorista.
Kabayatanna, impeksa ni PMaj. De Guzman ti tarigagayna a makipatang kadagiti transport groups a dumaldalyasat iti Marcos Highway tapno mapaka-ammuan manen dagitoy kadagiti linteg-trapiko nangruna ta accident-prone area ti nasao a kalsada.
