BAGUIO CITY – Dakkel a pangta iti seguridad ti Pilipinas ti panangibasura ni Presidente Rodrigo Duterte iti Visiting Forces Agreement (VFA) a napirmaan iti nagbaetan ti Estados Unidos ti Amerika ken ti Pilipinas.
Iti interview ti Bombo Radyo Baguio kenni Bombo International Correspondent Jun Villanueva a nakabase ita sadiay Los Angeles, California, kinunana a daytoy ti reaksiyon dagiti kaaduan a Pinoy sadiay Los Angeles iti nasao nga isyu.
Sigun kenkuana, adda dagiti Pinoy sadiay California a nangkuna a no kaspangarigan adda ti manggubat iti Pilipinas ket awan ti mabalin a pagkamangan ti pagilian a pagpatulongan para iti kanayonan a depensa gapu iti panakaibasura ti VFA.
Dinakamatna a patien dagiti Pinoy sadiay Amerika a kalpasan ti panakawaswas ti VFA ti Pinas ken Amerika ket nalaka itan a sakupen ti dadduma a nabibileg a pagilian kas iti China ti Pilipinas.
Innayonda a gapu iti kaawan ti VFA ket mapukaw dagiti benipisyo a maal-ala ti armada pwersa ti Pilipinas manipud iti nasao a katulagan kas iti oportunidad nga agsanay ti militar ti pagilian sadiay Amerika seknan iti nagduduma nga operasyon ken taktika iti panangsalwad iti Pilipinas manipud kadagiti nagduduma a peggad.
Impettengda pay nga awan ti mapukaw iti Amerika iti panakakanselar ti VFA.
