BAGUIO CITY – Maisaksakad ita iti lokal a konseho ti siudad ti Baguio singasing a gakat seknan iti panaka-regulate ti panagaramat ken umno a panakaibasura dagiti naaramat a mantika ken greasetrap waste kadagiti hotels ken restaurants ditoy siudad ti Baguio.
Panggep ti nasao nga ordinansa ni Councilor Leandro Yangot Jr. a maksayan dagiti rugit iti kanal wenno drainage gapu iti saan nga umno a panakaibelleng dagiti naaramat a mantika wenno greasetrap waste manipud kadagiti establishimento.
Maibasar iti ordinansa, nasken a maiproseso a naimbag dagiti naaramat a mantika babaen iti koordinasyon dagiti maseknan nga establishimento iti City Environment and Parks Management Office ken iti Sanitation Division ti City Health Services Office.
Maikonsidera pay a panaglabsing ti non-segregation wenno saan a panangisinasina daigti food establishments kadagiti naaramat a mantika ken greasetrap waste ken iti iligal a panakaibelleng dagitoy iti saan nga umno a lugar.
Agmulta dagiti aglabsing a negosyante, administrators, managers ken occupants ti maseknan a food establishments iti P2,000 agingga P5,000 ken posible a mawaswas ti business permit dagitoy.
