BAGUIO CITY – Im-imbestigaran ita ti COMELEC no nagtaud a mismo iti kandidato dagiti vote-buying materials a nakumpiskar dagiti pulis manipud iti maysa nga indibidual sadiay Dolores, Abra idi May 12.
Immuna iti daytoy, nakumpiskar ti maysa a reppet ti babassit a flyers ken P50 agingga P100 manipud iti maysa nga agkamkampanya a residente ti Baranggay Kimmalaba iti nasao a probinsia.
Sigun kadagiti pulis, nakumpiskarda dagiti nasao a materyal a maatap a maar-aramat iti vote-buying manipud iti maysa a supporter ti maysa a kandidato iti kinakagawad sadiay.
Nupay kasta, saan a nakemmeg ti nangiwaras kadagiti nasao a flyers a napakuyugan ti kwarta gaputa dagus daytoy a nakapanaw iti lugar.
Dumanon met iti P12,000 ti pakabuklan a gatad dagiti kwarta a nadekketan ti babassit a flyer.
Kabayatanna, nagbalin a natalinaay ti kaleppas a Barangay ken SK Elections sadiay Abra idi kalman.
Sigun kenni PSI Grace Maron, information officer ti Abra PPO, awan dagiti nailistada a nakakaro nga insidente idi kalman kabayatan ti nasao nga eleksion.
Dinakamatna a manipud naimplementar ti PNP-COMELEC checkpoint ken iti implementasyon ti Gun Ban ket uppat laeng ti nakemmeg dagitoy a nanglabsing iti nasao a paglintegan.
