BAGUIO CITY – Panggep ti Sanitation Division ti City Health Services Office ti Baguio a nayonan ti bilang dagiti Sanitation Health Inspectors ti siudad tapnu adda ti tumulong iti nainget a panagbantayda kadagiti panganan iti lokalidad.
Kagiddan iti daytoy, inaklon ni Engr. Charles Bryan Carame, dadaulo ti nasao nga opisina nga agkurkurangda iti manpower nga agwanawan ken agbantay kadagiti panganan ditoy siudad.
Kinunana a gapu iti daytoy ket saanda unay a maaramid ti trabahoda nangruna ta 16 a distrito ti siudad ti bambantayan dagiti sanitation inspectors ngem dumanon laeng iti 10 ti bilang dagitoy.
Dinakamatna a gapu iti nasao a pakaseknan ket apektado ti trabaho dagiti inspectors ken limitado laeng ti maipaay ti opisinada a report mainaig iti panagmintinir dagiti panganan iti kinadalus dagitoy.
Namnamaenna nga adda ti mailukat a bakante a posisyon para iti opisina dagitoy iti sumaruno a tawen.
Naamuan nga agarup laeng iti 2,000 a panganan ti rehistrado iti opisinada.
