BAGUIO CITY – Agtultuloy a dukduktalen dagiti pulis ti motibo ken pakabigbigan dagiti suspek a nangpalpaltog iti pimmusay a mannursuro iti sangwanan ti maysa a bus station sadiay Dagupan West, Tabuk City, Kalinga idi kalman.
Immunan a nabigbig ti biktima a ni Roger Cabotage Dulatre, 45-anyos ken residente ti Cawagayan, Pinukpuk, Kalinga.
Maibasar iti imbestigasyon ti pulisya, nakatakder ti biktima iti abay ti nakaparada a motorsiklona idi pinalpaltogan daytoy ti dua a suspek a nakalugan iti motorsiklo ken agpada a nakasuot ti helmet.
Sigun iti testigo, idi naka-asideg dagiti suspek iti biktima ket namin dua a pinaltogan ti back rider ti biktima.
Bimmaba pay ti back rider ken pinaltoganna manen iti namin dua a daras ti ulo ti biktima sakbayda a naglibas.
Narekober met dagiti pulis dagiti basyo ti bala ti caliber .45 iti nakapasamakan ti krimen.
