BAGUIO CITY – Imbilinen ni Mayor Mauricio Domogan ti panangpapartak ti City Engineering Office (CEO) ken ti City General Services Office (CGSO) iti panaka-survey ti 5 nga ektarya a paset ti 92-hectare a Baguio Dairy Farm a maipaima iti lokal a gobyerno babaen iti Department of Agriculture (DA).
Kinunana a nasken a kompletuen dagiti maseknan nga opisina ti nasao a survey iti uneg ti umno a panawen.
Dinakamat a babaen iti daytoy ket maaramiden dagiti kaskenan a plano iti paka-aramatan ti nasao a disso tapnu marisut ti sumagmamano a parikut ti siudad.
Innayonna a kalpasanna ket maisumitir ti plano sadiay DA para iti panakaipaay ti pormal a dokumento iti donasyonda a lote iti lokal a gobyerno ti Baguio.
Immunan nga inaprobaran ni Agriculture Secretary Emmanuel Piñol ti kiddaw ni Mayor Domogan a panangidonar ti DA iti lima nga ektarya a paset ti Baguio Dairy Farm tapnu aramaten ti siudad para iti panakarisut ti sumagmamano a parikut daytoy.
