BAGUIO CITY – Nainget nga im-imbestigaran ita dagiti pulis ti panakapapatay ti sigud a kapitan ti Tukucan, Tinoc, Ifugao idi kanikadua.
Sigun iti pulisya, bayat nga agmermeryenda ti biktima a ni Joseph Alicnas Calabson, 47-anyos ken ti asawa daytoy ket simrek iti pagtaenganda dagiti tallo a lallaki.
Kabayatan ti panakisarsarita dagiti tallo iti agasawa ket rimwar ti maysa kadagitoy.
Kalpasanna ket inruar ti dua a nabati a lallaki ti paltog dagitoy manipud iti imetda a backpacks ken sadiay a maysa kadagitoy ti nangpaltog iti ulo ti biktima.
Inasitgan ti maikadua a suspek ti nakadasay a biktima ken sadiay a pinalpaltoganna daytoy.
Simrek ti maikatlo a suspek iti balay ken sadiay a pinalpaltoganna met ti biktima.
Sakbay a pimmanaw dagiti tallo ket nangibatida iti uppat a kopya ti surat nga addaan tatak a Nona Del Rosario Command New People’s Army-Ifugao ken ditoy a nailanad ti panangaklonda iti krimen kagiddan ti panangakusarda iti biktima nga intel ti militar ken traydor iti ilida.
Nasarakan iti crime scene ti innem a basyo ti bala ti caliber 45, dua a bala ti caliber 45, tallo a bala, uppat a basyo ti bala ti caliber 40 ken maysa a black leather holster.
Maisayangkat me ti condemnation and indignation rally ita nga aldaw kagiddan ti tabon ti biktima para iti panakakiddaw ti hustisya para iti biktima ken iti panakaipeksa ti kiddaw iti saanen a panagturong dagiti rebelde a grupo sadiay ili ti Tinoc.
