Maisaksakad iti konseho ti maysa nga ordinansa maipapan iti panakapasayaat ti child justice system iti siudad ti Baguio.
Iti panakiuman ti Bombo Radyo kenni Councilor Elmer Datuin, ti author ti nasao nga ordinansa, kinunana a naipatungpal ti pilot study kadagiti sumagmamano a barangay para iti panakaadal ti kinaepektibo daytoy.
Sigun kenni Datuin, babaen ti panakaipatungpal ti training kadagiti punong barangays, barangay kagawads, Sangguniang Kabataan (SK) chairpersons, barangay secretaries, ken Civil Society Organization (CSO) representatives ket mapasayaat met ti child justice system gapu ta maisuro kadagitoy dagiti rumbeng nga aramidenda nu adda ti insidente ti panakaabuso dagiti ubbing wenno nu anya dagiti addang nga ipatungpalda nu nakaawat dagitoy iti reklamo.
Kinuna ni Datuin a kaadoan a panang-abuso a mapaspasamak kadagiti ubbing ket ti child labor, bullying, panang-abuso manipud kadagiti nagannak dagitoy mismo ken daduma pay.
Inlawlawag pay ti nasao a konsehal a nasken ti panakaipasa daytoy nga ordinasa gapu ta iti agdama ket ngumangato ti kaso ti panaka-abuso dagiti ubbing iti siudad ti Baguio.
Naituding met a ti training kadagiti barangay officials ket babaen iti panangidaulo ti City Social Welfare and Development Office (CSWDO) kaduada ti Department of the Interior and Local Government (DILG).
