BAGUIO CITY – Prayoridad ti incoming governor ti Benguet ti panakapasayaat ti serbisyo ken panakapalawa ti kapasidad ti Benguet General Hospital (BeGH) apaman nga agtugaw daytoy iti posisyon.
Kinuna ni Benguet Governor-elect Dr. Melchor Diclas a tarigagayna a mapalawa ti BeGH babaen iti kanayunan nga imprastraktura ken mapagbalin a 400-bed capacity manipod iti agdama a 200-bed capacity.
Inkarina met laeng a mapapintas ti serbisyo iti nasao a pagagasan a mangakomodar kadagiti umili iti probinsia.
Kinunana a saanna a kayat a maulit ti napasamak idi napalabas a tawen a nagkurang ti kapasidad ti ospital a mangakomodar kadagiti pasyente idi naaddaan iti dengue outbreak iti Benguet.
Innayonna nga agtalinaed latta iti lokal a gobyerno ti panakaimaton iti BeGH kontra iti singasing a maipaima daytoy iti Department of Health.
Impanamnamana nga awan met laeng ti mapabpaburan a grupo iti nasao a pagagasan gaputa mandato iti amin nga ospital nga awan ti mapilpili a maipaayan iti serbisyo.
