Impakaammo ni President Ferdinand Marcos Jr. nga adu ti maplanplano iti agdama para iti panakabiag manen dagiti nalalatak a landmarks idiay Manila kagiddan ti panggepda a panangrehabilitate iti Pasig River.
Iti panagbitla ti presidente iti maysa a programa idiay Manila, dinakamatna nga addan dagiti key projects a natalantanda kenni Manila Mayor Isko Moreno Domagoso a kasapulan a matarimaan wenno mabaliwan kas iti panakapabalin iti Intramuros Golf Course kas maysa nga Open Green Space.
Malaksid iti dayta, panggepda metlaeng a papintasen ti Plaza Calderon ken ti Lawton Underpass.
Iti sabali a bangir, impakaammo ni President Marcos Jr. ti panakaadda ti M/B Dalaray, baro a transportasyon a mabalin a makaisubli iti biag ti Pasig River.
Naiyuswat ti nasao nge electric ferry babaen iti Department of Science and Technology(DOST) a manamnama a makapaglayag iti Pasig River diretso iti aginggaa tallo nga oras.
Sigun iti presidente, manamnama nga agbalin a fully operational daytoy inton umay a bulan.
