Posible a marugyan inton umay a lawas ti panakatarimaan ti narba a kalsada sadiay Beckel La Trinidad, Benguet.
Sigun iti mapagtalkan a source ti Bombo Radyo a saanen a nagpabigbig, marugian a dagus ti pannakatarimaan ti kalsada iti kanito a malpas ti ritual.
Iti agdama, nakargaan ti nasao a kalsada iti plastic safety road barrier ken tolda tapno malapdan ti kapada nga insidente.
Maipalagip a pimmusay ti agtawen ti 13 nga ubbing kalpasan a natnag iti nasao a kalsada.
Gapu iti nasao nga insidente, nakaawat ti DPWH- Cordillera ken lokal a gobierno ti nasao nga ahensiya ti pammabalaw gapu iti nasao nga insidente.
Kabayatanna, nangipaulog ti memorandum order ni DPWH Sec. Vince Dizon a nangitunda iti pannakaikkat dagiti sumagmamano nga engineer iti Benguet first district engineering office a pakairamanan da engineer Isagani Cayme ken Maintenance Section Chief Engineer III Marjory Banao.
Naikkat dagitoy iti pwesto gapu iti maatap a kinakurang ti pannakaimuntar ti road safety signage ken traffic control devices.//Bombo Noveh Organo
