BAGUIO CITY — Pagpampanunutan paylaeng dagiti pulis ti rason iti panakatay ti lalaki a nasarakan a bangkay iti maysa a waig iti boundary ng Camp 8, Sta. Escolastica Village ken ti Barangay Hillside ditoy siudad ti Baguio idi kalman.
Nabigbig daytoy a ni Ruben Faroden Ofoob, 39-anyos, minero ken residente ti Hillside, Baguio City.
Sigun kenni PCI Jerry Haduca, commander ti Baguio City Police Office – Station 4, insalaysay dagiti kaaruba ti lalaki a naudi a nakitada daytoy a nabartek ken inmanehona ti luganna.
Kinunana nga iti panagresponde ti Scene of the Crime Operatives ket nakitada a nakasaksak paylaeng iti barukong ti lalaki ti kutsilyo.
Naamuan a sakbay a nasarakan ti bangkay ti lalaki ket nag-inom daytoy ken ti maysa a babae ken nagboluntaryo daytoy nga itulodna ti babae.
Idi nakadanundan iti Camp 8 ket mapapati a pinilit ti lalaki nga agnaigda iti babae ngem nagkedked ti babae ken bimmaba iti lugan.
Kalpasanna, dinungpar ti lalaki ti nasao a babae bayat a naidungpar iti railings ti rangtay sadiay ti lugan ti lalaki.
Nupay kasta, nasaralan laengen ti bangkay ti nasao a lalaki iti waig sadiay.
