Maisaysayangkat ti test drive kadagiti electric taxi iti siudad ti Baguio malaksid kadagiti electric vehicle a maitetest tapno maaramat kas baro a unit ti public utility jeepney a paset ti Public Utility Vehicle modernization program.
Maysa kadagiti kangrunaan a feature ti electric taxi ket ti kapabilidad daytoy a tumaray iti agarup uppat a gasut a kilometro nu daytoy ket na-full charge.
Dumanon laeng iti kinse minutos ti panagcharge iti daytoy kadagiti charging station bayat nga innem nga oras nu ti maaramat ket generator.
Iti agdama, ti siudad ti Baguio pay laeng ti naipaayan iti unit ti electric taxi para iti test drive.
Dakkel met ti maitulong daytoy iti panagkissay iti polusyon iti siudad.
Kabayatanna, saan a mailibak a ti siudad ti Baguio ti kadawyan a bisbisitaen dagiti turista gapu iti napintas a klima ken aglawlawa daytoy ngem kaaduan a reklamoda iti agdama ket ti polusyon nangruna iti asok a manipod kadagiti lugan.
Nupay kasta, nu maaprobaran ti pannakasukat kadagiti taxi iti electric taxi, dakkel ti agbalin a tulong daytoy tapno makissayan ti polusyon nangruna iti carbon emissions manipod kadagiti lugan.
Naipasigurado met a ti presyo ti electric taxi ket nababbaba ngem nu ikumpara kadagiti dadduma a unit ti taxi a magatgatang iti agdama.
