BAGUIO CITY – Linawlawagan ti mayor ti La Trinidad, Benguet ti panakatiliw ken panakaipaay ti citation ticket kadagiti taxi a nagtaud iti Baguio City ken nagturong iti masakupan ti nasao a munisipyo.
Kinuna ni Mayor Romeo Salda nga adu dagiti taxi drivers a nagturong ken nagreklamo iti opisinana gaputa tiniketan ti Traffic Manangement Unit (TMU) ti La Trinidad Municipal Police Station (LTMPS) dagitoy gapu iti panaglabsingda iti number coding ti La Trinidad.
Impettengna nga awan ti koordinasyon ti Baguio LGU iti opisinana seknan iti panangipatungpal dagitoy iti sigud a coding scheme iti siudad para kadagiti taxi.
Kinunana a daytoy ti rason no apay nga adda dagiti taxi drivers a natiketan kabayatan ti panagturongda sadiay La Trinidad.
Innayonna a naklaatda laengen idi nadamagda a naisubli manen ti odd-even scheme ti Baguio City.
Sigun pay kenni Mayor Salda, nakaawat daytoy ti tawag manipud kenni Baguio City Councilor Benny Bomogao a mangkidkiddaw iti konsiderasyonda kadagiti taxi a nagtaud iti siudad tapno saanen a matiketan dagitoy.
Gapu iti daytoy, imbilinna kadagiti pulis sadiay La Trinidad ti saanen a panagbayad dagiti natiketan a taxi drivers kas panangikonsiderana iti kiddaw ti nasao a konsehal.
Kagiddan iti daytoy, iyap-apela ni Mayor Salda ti saan a panangbabalaw kenkuana dagiti taxi drivers ti Baguio City gaputa saan met a naikoordinar kenkuana a naisubli manen ti odd-even scheme para kadagitoy.
