![](https://img.bomboradyo.com/baguio/2021/01/uram-quezon-hill.jpg)
BAGUIO CITY – Agtultuloy ti imbestigasyon dagiti otoridad iti rason ti panakauram ti dua a kadsaaran a pagtaengan sadiay 2nd Road, Quezon Hill Proper, Baguio City idi rabii kalman.
Nabigbig ti agtagikua iti balay a ni Deogracias Davy Sevillano, sigud a congressman ti 1st District Ilocos Norte ken residente ti Laoag, Ilocos Norte nga iti agdama ket pagnanaedan ti caretaker daytoy a ni Jerry Yungan Labador, 67-anyos.
Maibasar iti report, naireport kadagiti bombero ti uram iti agarup alas dies trentay singko idi rabii ken naideklara a fire-out iti alas-dose ti parbangon, no sadino, dimmann ti uram iti second alarm.
Naamuan a matmaturog ti caretaker iti umuna a kadsaaran ti balay idi adda nangngegna nga uni iti maikadua a kadsaaran ken iti panangsukimatna ket sadiay a nakitana a maur-uramen ti pagtaengan.
Mapattapatta a dumanon iti P150,000 ti danyos iti nasao nga uram bayat a naapektaran ti maysa a pamilya ngem awan met ti nadangran.
Naamuan pay nga awan ti suplay ti kuryente iti nasao a balay kalpasan a naputdan idi pay 1990’s.