BAGUIO CITY – Agtultuloy ti panagwanawan ti Department of Trade and Industry (DTI) – Baguio-Benguet kadagiti paglakuan ti agas kasaruno ti damag nga adda metten ti maatap a panagkurang iti suplay ti paracetamol ditoy siudad ti Baguio.
Sigun kenni DTI – Baguio-Benguet Consumer Protection Division Officer Richard Limpin, kadwada ti DOH ken FDA ket dumanon iti 22 a paglakuan ti agas ti nasukimat dagitoy ditoy siudad.
Kinunana a kabayatan ti panagwanawanda ket naduktalanda nga uppat a pharmacies ti naawanan ti suplay iti paracetamol.
Inlawlawagna met nga uray naawanan iti suplay iti paracetamol dagiti nasao a paglakuan ti agas ket saan a kaipapanna nga addan ti panagkurang iti suplay ti nasao nga agas.
Inyunay-unayna nga adu pay ti magatang a paracetamol kadagiti nagduduma a drug stores ditoy siudad ken adda pay ti magatang nga alternatibo nga agas.
Innayonna nga addan ti impaulogda a memorandum kadagiti nasao a pharmacies tapnu maliklikan ti hoarding a mangitunda iti panagkurang ti suplay ti paracetamol ken tapnu agpapada ti distribusyon ti nasao nga agas iti tunggal konsyumer wenno pamilya.
Maibasar iti memo, tunggal indibidual ket mapalubusan a gumatang ti 20 a pidaso ti 500g a tablet bayat a 60 a pidaso laeng ti mabalin a gatangen ti maysa a household wenno pamilya.
Kabayatanna, impalagip manen ni Limpin ti panangliklik dagiti konsyumer iti panaggatang kadagiti agas babaen iti online gaputa adda agilaklako nga awanan ti permit ken saan a maipasigurado a natalged ti lakoda nga agas.
