--Ads--

Kidkiddawen ni sigud a presidential spokesperson Atty. Harry Roque iti publiko ti panakikaykaysa dagitoy iti People Power tapno mapaikkat ni President Ferdinand Marcos Jr. iti takem.

Itay parbangon, indauloan ni Cavite 4th District Representative Kiko Barzaga ti nasao a tignay iti Forbes Park a pagnanaedan dagiti daduma a politiko a maatap a karaman iti naanomalyaan a flood control projects.

Sigun kenni Atty.Roque, nasayaat nga iti arubayan dagiti korap a politiko ti pakaangayan iti rally tapno ad-adda a mariknada ti pungtot dagiti umili gapu iti korapsyon.

Kagiddan dayta, impetteng ni Atty. Roque a rumbeng a ti presidente ti pabasulen iti korapsyon gapu ta daytoy ti mangidadaulo iti pagilian ken patienna a saan a koma a makaibulsa iti kwarta iti gobyerno dagiti opisyales kas kadagti naakusaran a ni sigud nga House Speaker Martin Romualdez ken ni sigud nga Ako Bicol Party-list Representative Zaldy Co nu awan iti pammalubosna.

Mainaig iti dayta, inakusaran ni Atty. Roque dagiti Marcos nga ar-aramatenda laeng ti gobyerno tapno agpabaknang a sigun kenkuana ket siguden nga inaramid daydi sigud a president Ferdinand Marcos ken itultuloy laeng ti anak daytoy a ni President Bongbong Marcos.