BAGUIO CITY – Aw-awisen ti Office of the Civil Defense-Cordillera ti publiko tapnu makipasetda iti maangay a Nationwide Simultaneous Earthquake Drill (NSED) inton Hunyo 21.
Sigun kenni Frances Ivy Carasi, information officer ti OCD-Cordillera, agserbi ti opisina ti Municipal Disaster Risk Reduction Management ti La Trinidad, Benguet kas pilot area ti NSED ditoy rehion.
Kinunana a nawaya met a makipaset ti amin a parapubliko ken pribado nga opisina iti nasao nga aktibidad.
Inyunay-yunayna manen ti kinapateg ti earthquake drill ken kinunana a babaen iti daytoy ket maisagana dagiti umili kadagiti didigra a posible a mapasaran.
Kabayatanna, dinakamat pay ni Carasi a malaksid iti NSED ket pagsagsaganaan met laeng ti OCD-Cordillera ti pannakarambak ti National Disaster Resilient Month inton bulan ti Hulyo.
