Agtultuloy latta ti panang-akomodar dagiti opisiales ti Commission on Elections kadagiti sumangbut nga indibidual nga agparehistro ita a maudi nga aldaw ti “registration” iti baet a mapaspasaran ti napigsa a panagtudtudo gapu iti epekto ti bagyo a Julian.
Iti interview ti Bombo Radyo kenni Atty Julius Torres, Regional Director ti Commission on Elections-Cordillera, kinunana a kadawyan nga ar-aramidenda ti nasao a banag numan pay napigsa ti panagbayakabak ti tudo ken nasuspindir ti trabaho dagiti dadduma a lugar a kas idiay probinsia ti Abra.
Idi nadamag ti nasao nga opisial nu adda ti panagngato ti bilang dagiti nagparehistro nu idilig iti napalabas a tawen, kinunana a bassit laeng ti panagngato ti bilang gaputa adu dagiti agak-akar nga indibidual paruar iti rehiyon Cordillera.
Maibasar iti datos, dumanonen iti 1,053,000 nga indibidiual ti nakapagrehistro kas botante wenno “registered voter” iti rehiyon Cordillera.
Nupay kasta, posible a ngumato pay ti nasao a bilang kalpasan ti Election Registration Board (ERB) hearing a maipatungpal inton Oktubre 15, sigun iti nasao nga opisial.
Ti Election Registration Board (ERB) hearing ket wagas tapno mai-update ti listaan ti registered voters nu sadinno, maikkat iti listaan dagiti pimmusay a maibasar iti rekord ti Local Civil Registrar, dagiti “deactivated” wenno dua a regular eleksion a saan a nakabotos ken dadduma pay a rason.
Kabayatanna, nakasaganan ti COMELEC-Cordillera para iti umuna nga aldaw a panangipila ti Certificate of Candidacy kadagiti agngayangay iti nagduduma a lugar iti Cordillera.
Sigun kenni Atty. Torres, namnamaenda nga adu ti mangipila nga agkandidato iti umuna nga aldaw ken ti maudi nga aldaw a kas iti kadawyan a mapaspasamak.
Impasigurado ti nasao nga opisial a naannayas ti panangipila ti Certificate of Candidacy iti kaaduan a probinsia ti rehiyon Cordillera pakairamanan ti siudad ti Baguio gaputa nakikoordinaren ti Commission on Elections kadagiti kameng ti Philippine National Police.
