Inaklun dagiti uppat a sigud a bodyguards ni sigud nga Ako Bicol party-list Rep. Zaldy Co nga immuna a pinanggep ti grupoda nga i-blackmail dagiti nalatak a politiko.
Dagiti nasao nga uppat a bodyguard ti nangisanud iti sinapataanda nga statements kontra kenni President Ferdinand “Bongbong” Marcos Jr., Leyte Rep. Martin Romualdez, Co ken dadduma pay a personalidad.
Maibasar iti affidavit ti maysa kadagiti nagsanud a bodyguard, punteriayada nga i-blackmail ken mang-extort kadagiti politiko, opisial ti gobierno a maipagarup a nairaman iti kurapsion, ken dadduma pay a nangato ti saadna a personalidad.
Innayonna a bayat ti panaglabas ti panawen, agtultuloy nga agbaliwbaliw dagiti personalidad a maipagarup a nairaman.
Iti sabali pay nga affidavit, nakalanad a pinanggepda a mangpataud iti impresion a nakaawat iti kuarta manipud kenni Zaldy Co dagiti personalidad a nainaig kadagiti alegasion.
Iti kanito nga agballigi dagitoy iti panggepda, impanamnama ni Atty. Levito Baligod a maipaayanda iti dakkel a gatad ti kuarta.
Kabayatanna, nainget a pinaglibakan ni Atty. Baligod ti statements dagiti uppat a sigud a bodyguards.
