BAGUIO CITY – Agyamyaman ni Team Lakay MMA fighter Jerry Olsim kadagiti amin a nangsuporta kenkuana iti panakipasetna iti SEA Games.
Napangabakan ni Olsim ti gold medal kontra iti nakabalubalna a ni Sarayut Klinming ti Thailand iti kickboxing event ti SEA Games.
Impannakkelna met a saan daytoy a narigatan iti labanna gaputa inaramatna ti abilidadna iti boksing.
Kinuna ti 24-year-old Igorot athlete a mabigbigbig dagiti Pilipino gapu iti kinalaing dagitoy iti boksing.
Innayon ti Bokodian Warrior a ninamnamana a magun-odna ti balligi gapu iti nainget a panagsagana iti aktibidad.
Sigun pay kenkuana, ti panangabakna iti gold medal iti kickboxing iti SEA Games ket maysa a ‘moment to remember’ gaputa nalaus ti ragsakna a naabakna ti atleta ti Thailand iti striking.
Inaklon ni Olsim a nalalaing dagiti Thai iti striking.
Maipalagip a ti ONE Warrior Series veteran ti nangited iti kaunaan a medalya ti Pilipinas iti kickboxing iti SEA Games, partikular iti men’s 69 kgs kicklight division.
