BAGUIO CITY – Agingga ita ket agtultuloy ti pananganop dagiti soldado kadagiti kameng ti New Peoples Army sadiay Ifugao.
Immunan a naaddaan iti engkwentro ti militar ken ti rebelde a grupo, partikular ti Nona del Rosario Command ti Ilocos-Cordillera Regional Committee, a tumulong kuma kadagiti kakadwada a nakaengkwentro dagiti otoridad sadiay Tuba, Benguet.
Kinuna ni Lt. Col. Nicolas Quemado Jr., commanding officer ti 54th IB, a kalpasan ti rinnupak sadiay Namal, Asipulo, Ifugao ket sumagmamano a rebelde manipud Nueva Ecija ti nagturong sadiay tapnu tulongan dagiti kakadwada a napupok iti cordon set-up ti tropa ti gobyerno.
Kinunana a nu saan a sumuko dagiti rebelde ket agtultuloy ti pananganopda kadagitoy a mapapati nga aglemlemmeng iti kabakiran sadiay.
Innayunna nga adda met laeng dagiti nasaripatpatan nga NPA sadiay sitios Ulnoy, Pakdal ken Nalapunan a nangbilin kadagiti natataengan nga agbakwit tapnu aglagaw dagiti sibilyan.
Patien met ti militar nga adda dagiti nangangato nga opisyal ti NPA a nadangran iti engkwentro isut gapuna nga immapela daytoy kadagiti rebelde nga ibabada ti armasda ken ipatamingda dagiti nadangran a kakadwada.
Impanamnamana a nakasagana dagiti helicopters ti Philippine Air Force a mangibakwit kadagiti nadangran a kameng ti NPA nu kasapulan.
