ctto
[BALITANG OFW]
BAGUIO CITY – Nainget ita ti panangbambantay ti Philippine Embassy sadiay Washington, D.C kadagiti Pilipino sadiay tapnu maipasigurado ti kinatalgedda manipud iti mapaspasaran sadiay nga arctic weather conditions ken iti winter storm Grayson.
Iti panakiyuman ti Bombo Radyo kenni Third Secretary ken Vice Consul Darell Ann Artates, Public Diplomacy Section Chief ti Philippine Embassy sadiay Washington, kinuana a nangiruar ti US National Weather Service iti hard freeze warning sadiay Florida, Georgia ken Alabama bayat a winter storm warning iti South Carolina ken wind chill advisories sadiay North Carolina ken Tennessee.
Kinunana a nakasagana met ti embahada a mangipaay ti itulong kadagiti Pilipino sadiay a maapektaran iti nakaro a sasaaden ti panawen no pagkasapulan.
Sigun kenkuana, mapaspasaran ita ti nakaro a lammin, panagtinnag ti niebe ken panagtudo iti sumagmamano a paset ti abagatan daya ti Estados Unidos ti Amerika.
Nagyaman met daytoy gaputa awan ti naawatda a report seknan kadagiti kailyan a naapektaran iti extreme weather condition sadiay ken awan ti nairaman a Pilipino kadagiti naipadamag a pimmusay sadiay gapu iti sasaaden ti panawen.
Dinakamatna a dumanon iti 150,000 dagiti Pilipino nga apektado sadiay Florida; 28,000 sadiay Georgia; 8,000 sadiay Alabama; 15,000 sadiay South Carolina; 29,000 sadiay North Carolina ken 14,000 sadiay Tennessee.
Innayonna a mabalin nga i-contact dagitoy dagiti Pilipino ditoy pagilian a saan a maka-contact iti kabagianda sadiay Amerika babaen iti social media. 😉
Kabayatanna, natalged ti kasasaad dagiti Pilipino nga agnanaed ken agtatrabaho ita sadiay North Carolina iti baet ti mapaspasaran sadiay a wind chill.
Sigun kenni Regifel Ballog, science teacher iti Pine Forest Middle School ken agnanaed sadiay Fayetteville, North Carolina, dimmanonen iti uppat a pulgada ti kapuskol ti niebe sadiay kalpasan a nag-snow manipud idi kalman agingga idi rabii.
Kinunana a sumagmamanon a counties sadiay North Carolina ti naipasidong iti “Black Ice” State of Emergency.
Innayonna a dua nga aldawen a nakanselar ti serrek kadagiti pagadalan sadiay gapu iti sasaaden ti panawen.
Dinakamatna a kaaduan a Pilipino sadiay ket mannursuro ken nars bayat nga iti paka-ammo ti presidente ti organisasyon dagiti Pilipino sadiay North Carolina ket agtaltalinaed a natalged dagiti amin a miembro.
Saan met unay nga apektado dagiti Pilipino sadiay Canada iti sasaaden ti panawen ngem nabalakadan dagitoy nga agtalinaed iti uneg ti babbalayda ken ti nabuntog a panagmaneho dagitoy tapnu maliklikan dagiti aksidente.
Naibalakad pay ti panagisuot met dagiti Pilipino sadiay Washington iti napupuskol a bado ken ti panagtalinaedda iti uneg ti babbalay wenno pasdek dagitoy.
