BAGUIO CITY – Inlawlawag ti City Administrator ti Baguio ti panangdillaw ni Mayor Benjamin Magalong kadagiti inawaganna a substandard a proyekto ti DWPH-Baguio ken iti dadaulo ti nasao nga opisina.
Iti interview ti Bombo Radyo Baguio, kinuna ni Engr. Bonifacio Dela Peña a ti ‘flare-up’ ti mayor ket intunda ti panakapunno daytoy kadagiti nasukimatda a substandard wenno saan a pimmasa a proyekto iti sidong ti DWPH-Baguio.
Sigun kenkuana, iti lima a proyekto a sinukimatda iti napalabas a lawas ket dua laeng ti nakapasa bayat a saan nga ‘acceptable’ dagiti tallo a dadduma pay.
Kinunana nga adu ti nakita ti mayor a saan a nasayaat iti tay-ak ti finishing wenno panakaileppas dagitoy.
Dinakamatna ti rehabilitation center ti Philippine Sports Commission sadiay Teacher’s Camp a saan a nakapasa iti inspeksion malaksid pay kadagiti nakitada a nabaybay-an a konstruksion dagiti pasdek ken barangay halls.
Inyunay-unay pay ni Engr. Dela Peña a ti panangsitar ti mayor kenni DPWH-Baguio City District Engineer Rene Zarate ket paset ti ‘command responsibility’.
Inlawlawagna a ti adda ti nagkuranganna kadagiti nasao a proyekto ket dagiti personnel ti DPWH-Baguio gaputa rumbeng kuma a naaddaan dagitoy iti panagkaykaysa iti implementasyon dagiti proyekto.
Kinunana a nasken a kabayatan ti implementasyon ti proyekto ket nasken a nagsukimatdan tapnu makita dagiti nasken a maisimpa ken saan laeng nga iti final inspection ti panag-inspeksion dagitoy.
